Kisah Entakit

Part 1

Dulu suba bisi siku anak Iban ti pemadu tebilang enggau ulah ti nyelai dalam pengidup kitai Iban. Nyadi ditu orang nya ti dikumbai 'ENTAKIT'. Entakit tu udu amat nyelai laban ti mayuh ulah ti tau ngasuh kitai balat amat geli ati. Tau enda kering gusi bai ya. Terubah ya aku ka mantai ke ensera ti benama 'KISAH ENTAKIT'
Entakit tu bisi bini lalu bisi siku anak. Nyadi semina sida tiga menyanak aja meh sida sebilik. nadai bala tauka kaban belayan. Sida menyanak tu tinggal begulai enggau orang mega ba menua sida. Pengidup tudah Entakit sebilik semina betanam betupi enggau bumai. Nyadi nya meh kena sida iya sebilik ngidup kediri seumur idup sida. Ka kereja ke nengeri nadai ga pemandai tudah Entakit, pia mega tuda bini enggau anak iya. Ngarap ke jereki rumah panjai aja meh sida menyanak.
Nyadi bisi sekali, Entakit, bini iya enggau anak iya ka ngalu ke pasar. laban ka bebeli ke utai ke nadai di rumah. Penyauh ke pasar enda alah sejam wai, datai setengah hari ari menua sida. Tudah sida tiga menyanak merau deh ngalu ke pasar. enda ga bangat merinsa amat deh. Bisi meh nya utai kena. Nyadi tudah Entakit tu di luan, anak ya di tengah, bini ya dikemudi megai injin perau. Ukai nama deh bini ya megai, laban ke nemu agi meh ari tudah Entakit. Mar ga tudah Entakit tu muntat mimit.
Sepemanjai tudah sida tiga menyanak ke merau, dia meh tudah perau sida puh amat tesangkut ba batang. Nyadi tudah bini ya tu nyau enda tan deh laban puh amat tesangkut. Pemuas ya lalu madah meh tudah tuai ngagai entakit ambi meda batang ke di luan, "Oo..Entakit, ya lapa pengawa dek tak enda tepeda ke batang diluan dia. Kini ke mata di bangat jual. Kitai nyau abis tesangkut deriba. Anang bangat ngemangka nya neh. Padah pama bisi batang,"ku tudah bini ya. Saut Entakit, "Au meh, lagi aku madah deh. Tak kutap-kutap ku aku, ti ukai bini aku kapa aku nya."
Madah meh tudah Entakit tu tadi ngagai bini ya ke batang. "Apu, nyin ya batang, "ku Entakit. Nyeliah ga bini ya. "Nyin ya batang,"ku tudah entakit madah baru. Nyau betimbal-timbal ya madah ke bisi batang. Pia ke kanan, pia ke kiba. Enda temu tuju utai ke padah. Dini enda, ukai semina batang ke ba sungai aja ke padah, semua batang ke ba pantai padah ke iya magang. Nyau sehari manah tudah sida tiga menyanak ngalu...ila aku nampung baru...part 2.