PENGUDAH 2 taun ke udah lalu rumbau pengerindu enggau ambai lama, diak aku mutus ati ngejang ke menua Malaya ngadu diri ngiga penemu nyambung Degree ba KLMUC , B.A (Hons) Accounting & Finance ba taun 2012. Taja pen bebekau , pengingat nya sigi agi mengkang, tang meh, pemedih ati ke semaya rumbau udah gerai laban bisi penawar bisa ngundang di beri Tuhan ngagai aku.Bepun ari pendiau tudah aku ba Menua Malaya, dia meh aku tu tadi begulai ngau kaban aku Petrus Sanabong, ti ngambi Degree Tourism Management siku ari kaban ti pemadu lama begulai ari Form 1 nyentuk ke Degree,segulai endur diau asrama ngelui ke bilik. Lalu betemu ngau siku agi dak kaban ari Tuaran ,Sabah, Andrew Rolland, ti ngambi Degree Multimedia Kami 3 meh nyau segulai bekunsi barang pemakai, gari, enggau perengka ti bukai taja bida bidang utai ambi.Seduai ti pemadu manah begulai enngau aku, laban aku ke suah enda chukup belanja , seduai meh nyaup tudah aku. Apai enggau indai ari menua selalu ngirum duit semina RM200 ke belanja, taja sida ulih ngirum lebih ari nya. Kebuah iya laban aku ka belajar ngidup ke diri ba menua orang, tambah mega aku siru ke seduai ti ngiga belanja kena nyekula ke tudah aku. Berat meh ati suba lebuh ninggal ke menua, bala menyadi, apai enggau indai, tudah aku tu ke dikarap ulih apai enggau indai ngadu ke sawit, ngejang ninggal ke sida, enda lantang meh ati laban aku tu nadai sida, ka pen enda laban ke ka ngemaju diri empu kena napi pengidup dudi ari.
Sepemanjai diau ba Malaya, aku mega begulai enggau menyadi aku ,Entai , lumur 2 tuai kami madik, aku ti ke biak lumur 4. Maya ujung minggu meh aku ngelawa sida menyanak ba Shah Alam, selalu ga meri belanja taja pen mimit. Lantang ati diau ba menua orang laban bisi sida ti suah meri sukung pia ari jaku, belanja, utai kena mindah kin kia serta endur diau nyentuk ke diatu.
Ngenang pendiau maya sekula ba KLMUC, diak tudah aku nyau nemu belajar ngidup ke diri ba menua orang. Laban ke asrama PV10, ba Setapak, berundang tiap ari ke kolej, lebih kurang 20 minit enti enda jem, kolej nya ba Jalai Raja Laut, sepiak Chow Kit, KL. Jadual kelas kekadang enda entu tetap iga , bisi nya malam, bisi ga pagi enggau lemai, suah ke malam ngambi siang diau ba rumah , nyamai ngadu diri.
Maya ujung minggu , nyau begulai enggau bala nembiak gereja ga, sembiang lalu bemain futsal ngalih ke lemai. Pia ke ngereja pengawa gereja, suah ga tiap malam ari 3 enggau 5. Nyau enda ga berasai ngapuh ke ari laban mayuh pengawa.
Ari silih beganti, enda berasai ambis ka taun 2012, lalu datai ga ba taun 2013. Nyau makin ranchak ga taun asai ya sepi aku. Belebuh bulan 5, aku nyau makin sibuk ngau pengawa gereja, nyadi driba van gereja, nganjung orang kin kia, nyau nyukat KL. Pia ke belagu enggau main music, pia ke pengawa sekula ti mayuh assignment enggau project laban ke taun ke penudi aku belajar meh nya.
Enda berasai ga kekadang, belebuh maya lepa, teringat belama ke ambai lama. Enda berasai ga ai mata labuh ngenang ia, 3 taun ti udah madu pengerindu, tau lalu rumbau. Nadai ga tepikir ka ngiga ganti laban ke sibuk belama. Semina ulih nyabak kediri dalam ati ngenang belama tudah ambai lama, ka digiga enda ga temu rita, ngasuh ati begedi ngenang iya.
Bepun bulan 6, aku nyau makin sinu, ngenang diri ke ka ambis belajar, bendar amat begulai enggau bala kaban ba menua Malaya, sigi enda kala pungkang ka ketawa, bekunsi idea, penusah sama nanggung mega.Laban ke driba van, nganjung orang, nyau mayuh bekelala enggau orang indu, nyema bisi ke ngait ati tau beambai ko asai ati din, nadai ga ke deka. Ko ati din indu Iban aja ke deka, laban ke mayuh bala Sabahan.
Pemuas iya, bisi siku indu baru jemaat gereja, minta ambi jam 7 pagi, laban ka nurun sembiang, sembiang ari minggu start jam 9. Sekali nya aku laun ngambi, nyau minta ampun ngagai tudah ya, nyau tekait mata meda indu Iban, sama gereja dini enda aku lalu lekat. Minta ga lumur talipun, lalu belabuh be-sms meh kami duai. Iya madah ke nama diri Vivian, ari Julau. Aku madah ke nama enggau penatai diri mega nuju iya.
Nyau bekelala meh tudah aku enggau Vivian belabuh bulan 7 pia, lalu bekaban. Angkat sekali bisi pengawa ga tudah aku tu tadi ba Miri, belebuh cuti semester ke penudi, 3 minggu, nadai ga bepeda enggau iya, asai ke labuh pengerindu nuntung ati din. Nyau nguji ga nundi nyangka nya bisi orang ngempu tauka nadai, tau ga ngempu adan ke puang nya. Lalu enda mukai-mukai iya madah kediri sigi nadai orang ngempu, iya mega madah minta ampun laban ati ya sigi nyau udah labuh pengerindu nuju aku. Enda ga iya belalai madah baka nya, laban iya sigi ngiga orang ke sama pengarap mega.
Lalu bepun ari nya pengerindu ditanggam, semaya, komitmen, serta perambu begulai naka ni penyauh ke deka ati. 29/9/2013, tetap udah semaya nanggam pengerindu bepangan, lalu ngejung ke tudah aku last semester. Nyau makin begulai rindu enggau iya, bekunsi semua penanggur, sama-sama ngadu. Lalu maya nya mega ati aku sinu, ditinggal ke kaban aku Petrus , pulai ke Sarawak, laban udah dismiss ari Kolej. Tinggal meh tudah aku enggau Andrew. Nya pen Andrew suah nadai enggau begulai, aku lalu mai Vivian betemu ngambi muai penyinu nadai bala kaban.
Vivian sulu atiku, nyau enggai beleka ke pangan diri, lalu merambu ka jadi ti iya udah ambis belajar, aku lalu ngiga kereja kena nganti iya ke ambis. Nyau bekalih ga taun, 2014, udah baka melaki bini ga kami duai, bekunsi duit, penanggur, perengka pangan diri enggau mayuh utai bukai.Pandak cherita, ti nyema kawin tumu, tua iya sigi beserah, lalu semaya pulai gawai bulan 6 sigi nemuai ngagai menua Vivian. Bisi mega aku madah ngagai apai enggau indai aku empu sigi ka jadi enggau Vivian, sida pen setuju mega.
1/6/2014... aku pulai ngagai menua Vivian ba Julau, nitih ke semaya kami duai sebedau tu. Angkat nanya mega tudah apai Vivian, ni naka aku enggau Vivian begulai, lalu aku nyaut, sigi ka jadi meh. Enda mukai-mukai iya lalu ngasuh apai enggau indai aku datai muka tali manuk ti udah ditanchang , tang enda entu rat, agi ulih buka mega. Lalu pulai ke Miri meh tudah aku 4/6/2014, ngambat apai enggau indai aku bai ke Julau.
7/6/2014....Beterang meh antara aku enggau Vivian ngena adat Iban ba Julau. Apai enggau Indai kami duai lalu nanggam kami duai jadi, tegap meh udah pengerindu aku enggau iya. Lalu ngaga Surat Kawin ba Pejabat Daerah Subis, Niah besaksi ke apai aku ngari ke aku, Tuai Rumah Patrick Libau ngari ke bini aku.Lantang udah seput aku, pengerindu aku udah mujur, aku pen nyau gawa, bini aku Vivian pen nyambung sekula.
PENGINGAT lama udah tekubur lama dalam ati, penatai Vivian ngundang pengidup baru. Berasai gaga amat ati aku ngembuan bini baka ya ni mentas, nemu ngintu pengawa ba rumah, ngintu temuai ke datai. Lalu merambu ari diatu meh kami duai pengidup dudi ari dalam pengidup berumahtangga datai ke jemah ila ngambi ke tegap lalu tetap belama. Beterima Kasih ngagai Tuhan ti udah nyediaka semua ungkup kami duai, pia iya semua chukup taja mimit.
Baka munyi ko lagu, pengerindu ba ujung cherita, betanchang teguh tali semaya, ngujung ke pengerindu mujur lantang belama datai ke jemah ila. Tuhan merekat pejalai pengidup aku enggau iya, Vivian.Nelson @ lat
